UN Wuhpung Ni Kaw Nna Hpyen Yen Dabang Ni Hpe Garum Ningtum Jaw

UN Wuhpung Ni Kaw Nna Hpyen Yen Dabang Ni Hpe Garum Ningtum Jaw

2013 ning September shata 16 ya shana maga hkying (3:30)am aten UN wuhpung rai nga ai WFP, UNHCR, OCHA, UNICEF, MSF wuhpung ni  gaw KIO uphkang ginra, Laiza Muklum de hpyen majan a majaw hpyen yen nga ai ni hpe garum ningtum jaw lu na matu sa du ai lam chye lu ai.

Ndai wuhpung ni hku nna Laiza Masat (3) hpyen yen dabang, Woichyai Hpyen Yen Dabang, Je Yang hpyen yen dabang, Hpun Lum Yang hpyen yen dabang ni a matu tsi mawan hte shat gawk lang arung arai, dum nta gaw gap arung arai hte shata mi a matu malu masha ni hpe sa du garum ai re hpe chye lu ai.

Ndai hpyen yen dabang ni hpe UN wuhpung rai nga ai WFP, UNHCR, OCHA, UNICEF wuhpung ni kaw na sa du garum ningtum jaw ai gaw ndai shata laman (2) lang rai nga sai hte matut nna mung  ndai shata laman kalang naw sa du garum ya na re lam chye lu ai.

Ndai lang sa du garum ai hta MSF hte ACTED wuhpung ni mung lawm nna, dai ni na nhtoi hta Sinpraw Ginwang Ginjaw, Lahkawng Pa hpyen yen dabang hta mung UN wuhpung kaw nna hpyen yen masha ni a matu sa du garum ningtum jaw ai lam nga ai hpe mung chye lu ai.

Ndai UN wuhpung ni hku nna ndai zawn sa du ai hta ginra kata ta tut bungli galaw nga ai NGO wuhpung ni hpe Protection wunkat kadun (2) ya jaw sa wa na lam, garum ningtum arung arai hte malu masha ni hpe September (17) hte (18) ya laman garan sa wa na re lam hte (19) ya shani bai nhtang wa na re lam hpe chye lu ai. 

 jinghpawland.com

请扫描左边的黑白二维码图片，即可识别关注“景颇大地”公众号